من طرف the one الأربعاء 23 أبريل 2008, 12:00 amبسم الله الرحمن الرحيم
تعادل اليفربول وتشيلسي في لقاء رائع جدا تكتيكيا وفنيا وتدريبيا , بس الحظ ( والحظ وحده ) وقف جنب تشيلسي في مباراة تسيدها ليفربول , واطاح فيها لاعبوا الليفر بفرص عديدة , علشان كده كان عقابهم ان ( رايزي ) يدخل جون في نفسه !
هنبتدي بالتشكيل للفرقتين :
تشكيلة ليفربول : ريينا ( حارس مرمي ) , ( الدفاع ) جيمي كارجهار , مارتن سكرتل , اربيلوا , فابيو اوريليو , ( الوسط ) ماسكيرانو , كزافي الونزو , ستيفن جيرارد , ( الهجوم ) ديرك كيوت , ريان بابل , فيرناندو توريس .
تشكيلة تشيلسي : بيتر تشيك ( حارس مرمي ) , ( الدفاع ) جون تيري , ريكاردو كارفالو , باولو فيريرا , اشلي كول , ( الوسط ) فرانك لامبارد , كلود مكاليلي , فلورنت مالودا , جو كول , مايكل بالاك , ( الهجوم ) ديديه دروجبا .
التغييرات : ( ليفربول ) خرج اوريليو للاصابة ونزل مكانه رايزي , وخرج ريان بابل ونزل بنعيون
( تشيلسي ) خرج جو كول ونزل سالمون كالو , وخرج بالاك ونزل بلال انيلكا .
بدا الماتش بدايه سريعه وبضغط هجومي سريع ومباغت لتشيلسي , وكانوا هيتقدموا بهدف لدروجبا لكن الحارس والدفاع تصدوا للهجمة , ومن بعدها بدا الليفر يسيطر علي المباراه بفضل تالق نجم اللقاء الاول ( كزافي الونزو ) في السيطرة علي وسط الملعب بشكل رائع , وبدات الهجمات الحمراء تتوالي بشكل مرعب , حتي جاءت لقطة الفرح الاولي لليفر , من دربكه في منطقة الجزاء من الناحية اليمين توصل الكوره علي حدود منظقة الجزاء لجيرارد , بيسددها لكن ( بتقلش ) وتوصل لكيوت اللي بيسددها علي طول من بين رجلين تشيك , وبيعلن عن الهدف الاول لليفر , قبل نهاية الشوط الاول بدقيقتين .
الشوط الثاني بيبدا بتفقو ميداني واضح لليفر بفضل المهاره الرائعه للثلاثي : جيرارد وماسكيرانو والنزو ( نجم الماتش ) ومن قدامهم بابل وكيوت , اللي كانوا بيساندوا خط الوسط بشكل رائع جدا , ومن وراهم الدفاع المحكم بقيادة الرائع كارجهار , والناشئ السلوفاكي سكرتل , بعد مرور عشر دقايق بيتصاب اوريليو وينزل مكانه رايزي , وبرضه بينزل كالو مكان جو كول في تشيلسي , وبيمر الماتش بدون هجمات , الليفر مكتفي بالهدف وتشيلسي مابيحاولش , ودروجبا واقف تماما بفضل نجم دفاع الليفر سكرتل اللي مكتف دروجبا تماما , وبيمشي الماتش لحد الدقايق الاخيرة اللي بتشهد سخونه نوعا ما , وهجمات متبادله للطرفين , وبيضيع توريس فرصه خطيره لليفر , وبعدها بيخرج بابل وبينزل بنعيون لليفر , وفي اخر سبع دقايق بيطلع بالاك وينزل بلال انيلكا في تشيلسي , وبيسخن الماتش جدا , وبيزيد الضغط من ليفربول علشان يحاولوا تعزيز النتيجه , وبالفعل كانوا هيعملوها لكن كورة جيرارد الجميله بيتصدي ليها تشيك بطريقة رائعه , وكورة تانيه في الدقيقه 92 بيسددها جيرارد برضه في جسم الحارس المتالق تشيك , وبترد الكورة بكورة طايشة لتشيلسي , توصل لكالو علي الناحية اليمين يعملها عرضيه , يدخل فيها رايزي بسوء توفيق غريب بدماغه ويسددها في المرمي في وسط ذهول زمايله والجماهير ولعيبة تشيلسي نفسهم , اللي لم يقدموا اي شئ يستحقوا عليه التعادل , وفي انتظار ماتش العوده الاسبوع الجاي , وبضمنلكم المتعه في لقاء الاسبوع القادم , وماتنسوش ان فيه ماتش بكره بين البرسا والمان يونايتد , وشكرا .
